FOTOGALERÍA | Unha emocionada Pilar Cernuda recolleu o premio Carlos Casares de Xornalismo 2024
O pasado venres, o Casino Antelano de Xinzo acollía a gala de entrega do Premio de Xornalismo Literario Carlos Casares 2024. Nesta terceira edición o galardón foi entregado a Pilar García-Cernuda Lago como recoñecemento á súa destacada traxectoria profesional e o seu compromiso coa divulgación a través do xornalismo. Nada en Compostela, a recoñecida xornalista e escritora mostrouse visiblemente emocionada ao longo dun acto que se converteu nunha clara homenaxe á súa prolífica carreira.
O evento contou coa presenza de numerosas autoridades, entre elas Amador Díaz, alcalde de Xinzo de Limia; Miguel Santalices, presidente do Parlamento de Galicia; Luis Menor, presidente da Deputación de Ourense; Manuel Pardo, delegado territorial en Ourense da Xunta de Galicia; Carlos Gómez, concelleiro de Cultura; e Xabier Casares, presidente da Fundación Carlos Casares. Tamén estiveron presentes os premiados nas dúas edicións anteriores, Alfonso Vázquez-Monxardín e Antonio Piñeiro, quen acompañaron a homenaxeada nunha velada marcada polo recoñecemento ao xornalismo literario.
Durante o acto o secretario do xurado Rafael Laso leu a acta que destacaba os méritos de Pilar Cernuda para recibir este recoñecemento, e Héctor Díaz fixo a loubanza da premiada. Na súa intervención, o alcalde Amador Díaz destacou a profunda tradición xornalística de Xinzo, lembrando os primeiros xornais da vila no século XX e o importante papel que hoxe xogan os medios dixitais locais: “Este galardón é un tributo á palabra, que forma parte da nosa identidade colectiva, e á figura de Carlos Casares, cuxa obra segue inspirando novas xeracións” afirmou.
Postos en marcha polo Concello de Xinzo de Limia, coa colaboración de entidades culturais da zona e da Fundación Carlos Casares, os Premios de Xornalismo Literario Carlos Casares son unha clara aposta para poñer de relevo a figura de Carlos Casares e o vínculo de Xinzo coa literatura e o xornalismo. A propia Pilar Cernuda recoñecíallo a este diario nunha entrevista: "Me parece una idea magnífica que una ciudad pequeña como Xinzo de Limia haya creado un premio con su nombre, todo ello es un incentivo para la lectura".