O BNG pide ao Concello un sistema equitativo de reparto de subvencións

O grupo municipal do Bloque Nacionalista Galego en Xinzo de Limia presentou unha moción para instar ao Grupo de Goberno a modificar o actual sistema de subvencións nominativas destinadas aos clubes e asociacións culturais e deportivas. O obxectivo é establecer bases reguladoras claras que fomenten a transparencia e a confianza entre as entidades locais.

Camilo Vila, voceiro do BNG, destacou que "a transparencia é fundamental para fortalecer o tecido asociativo e crear un clima de colaboración en Xinzo. Ademais, garantimos que ningunha entidade reciba menos recursos con este novo sistema". Vila engadiu que "o modelo actual xera desconfianza, e queremos mudalo para reforzar a cohesión entre os colectivos".

A iniciativa nace do contacto directo co tecido asociativo, que expresou preocupación pola falta de criterios claros na asignación das axudas. A proposta inclúe a creación de bases reguladoras con criterios obxectivos e un espazo de participación para as entidades, ademais dunha campaña informativa para explicar os cambios.

"Apostamos por un modelo exemplar de transparencia e boa xestión, onde todas as entidades se sintan valoradas polo seu traballo", concluíu Camilo Vila.