NOTICIAS A LIMIA | A Chikiband participa no Festival de Bandas Infantís e Xuvenís de Galicia

A Chikiband, formación infantil da Agrupación Musical da Limia, é unha das participantes do VI Festival de Bandas Infantís e Xuvenís de Galicia, que se celebrará este sábado na Cidade da Cultura de Santiago, onde representarán ao concello de Xinzo. O grupo limiao é un dos 12 que formará parte deste certame que reunirá a uns 600 nenos de diferentes puntos da xeografía galega.

Os nenos da Agrupación Musical da Limia actuarán na quenda de mañá, concretamente ás 12:30 horas. Ao longo do día, neste festival participarán outras formacións como a Banda Xuvenil de Vilatuxe, a Banda de música Santádega ou a Banda Sinfónica Xuvenil Galega, esta última composta por integrantes de grupos populares de toda Galicia. O evento rematará cunha entrega de diplomas para os participantes.

A Chikiband chega a este festival despois de colleitar éxitos. A finais do 2022 gañou o Certame Galego de Bandas de Música, que se celebrou en Celanova, na sección infantil. Este concurso, ao igual que o festival deste sábado, estivo organizado pola Federación Galega de Bandas de Música Populares.