NOTICIAS A LIMIA | O Museo do Entroido pódese visitar até mañá

O Museo do Entroido de Xinzo de Limia pódese visitar estes días e estará aberto esta tarde e durante toda a xornada de mañá. Despois duns meses sen abrir as súas portas, o museo empezou o ano coa apertura a grupos de escolares o venres previo ao Corredoiro. Ese día, alumnas e alumnos dos colexios Carlos Casares e Rosalía de Castro inauguraron a tempada de visitas.

Agora, o museo permanece aberto desde o pasado venres, en horario de mañá (de 10 a 13:30 horas) e tarde (de 16 a 19:00 horas). As visitas son gratuítas e no percorrido poden coñecerse as máscaras e traxes e personaxes do Entroido galego e ourensán, con protagonismo para as tradicións do Triángulo Máxico.

O museo está aberto este luns e tamén mañá. Despois, a Deputación Provincial de Ourense deberá determinar os novos horarios unha vez superada a alerta sanitaria pola covid-19. 

Nestas xornadas de Entroido limiao, a presenza de numerosos visitantes atraeu até o museo gran cantidade de público, en especial, familias con cativos. Onte, Domingo de Entroido, o número de visitantes rexistrados foi de 168 persoas, a maioría procedentes de distintos puntos de Galicia.

O Museo do Entroido foi inaugurado a finais de 2015 e a súa xestión depende da Deputación de Ourense desde febreiro de 2019. Antes da pandemia, o habitual era que o museo abrise até seis días por semana. No 2020 e no 2021 pasou varios meses pechado.