NOTICIAS XINZO | Nova colaboración da USC e Concello para promover a inclusión educativa
O Concello de Xinzo de Limia recibirá mañá, mércores 23 de abril, unha nova visita do alumnado do Grao en Pedagoxía da Universidade de Santiago de Compostela (USC), nunha actividade que inaugura o seminario "Educación e participación na construción normativa das comunidades de acollida en Xinzo de Limia", que se desenvolverá ata o venres 25 de abril.
Esta iniciativa forma parte dun proxecto formativo consolidado, froito da estreita e frutífera colaboración entre a USC e o Concello de Xinzo de Limia ao longo dos últimos anos. Ambas as dúas institucións levan tempo traballando conxuntamente na promoción de valores como a convivencia, a inclusión e a diversidade cultural, facendo de Xinzo un auténtico laboratorio pedagóxico para a formación universitaria.
A xornada do mércores comezará cunha visita ao IES Cidade de Antioquía, onde o alumnado poderá coñecer prácticas educativas inclusivas desenvolvidas nun contexto escolar caracterizado pola pluralidade cultural. Pola tarde, os estudantes participarán nun encontro cos servizos técnicos do Concello e con representantes do ámbito cultural e social da vila, onde se presentarán diferentes políticas e iniciativas municipais orientadas á acollida e integración de persoas migrantes.
O seminario está coordinado polo profesor Alexandre Sotelino, recoñecido docente da USC e membro do Grupo de Investigación Esculca. Investigador de referencia no ámbito da pedagoxía e da participación cidadá, Sotelino leva anos impulsando este tipo de experiencias formativas baseadas na conexión entre universidade e comunidade. O seu traballo destacou tanto no plano docente como investigador pola súa capacidade para crear pontes entre o coñecemento académico e os desafíos sociais reais.
Este seminario representa unha oportunidade única para que o alumnado experimente, reflexione e dialogue sobre a construción colectiva de comunidades máis xustas, participativas e solidarias. A elección de Xinzo de Limia como escenario non é casual: trátase dun municipio que acolle a persoas de máis de corenta nacionalidades e que se ten convertido nun exemplo de xestión local da diversidade.