AXENDA | Laroá daralle este sábado o nome do seu gaiteiro a unha das súas rúas

Veciñas, veciños, familiares e gaiteiros da Limia están este sábado convidados á homenaxe que o pobo de Laroá lle renderá a un dos seus ilustres, Juan Ferreiro Ferreiro, "o gaiterio de Laroá".

Todos queren homenaxear, a título póstumo e coincidindo co 25 aniversario do seu pasamento, a un músico autodidacta que colocou a esta localidade da comarca limiá no mapa do panorama musical tradicional do país. 

E farano este sábado, ás 12:00 horas. Haberá música dos gaiteiros de Laroá, falarán veciños e representantes da familia e, como non podería ser doutro xeito, haberá troula á hora do vermú, ao que todas e todos os asistentes estarán convidadas. 

Actuarán as corais de Baltar e Sarreaus previo ao descubremento dunha placa que lle dará nome ao carreiro onde naceu e viviu Juan Ferreiro Ferreiro.