AXENDA | Descubrindo o legado literario de Antón Tovar

O Concello de Xinzo de Limia ríndelle homenaxe a Antón Tovar coa organización dunha mesa redonda dedicada ao escritor nado na Pereira (Rairiz de Veiga), figura destacada da literatura limiá. Un encontro no que se analizará a figura do escritor e do gran legado literario que deixou, enriquecendo o panorama cultural de Galicia, e que se converterá nunha oportunidade para descubrir a relevancia da súa obra na actualidade.

Baixo o título "Antón Tovar, o poeta e o home", na mesa redonda abordarase unha pregunta clave: é relevante a poesía de Antón Tovar para os novos lectores de hoxe? Unha cuestión á que tentarán dar resposta tres persoas de recoñecida traxectoria e profundo coñecemento da obra de Tovar: Xesús Alonso Montero, Rochi Novoa e Delfín Caseiro, baixo a moderación de Gustavo A. Garrido.

A actividade, organizada polo Concello de Xinzo de Limia, conta coa colaboración da Fundación Carlos Casares e da Biblioteca Municipal Antelana. Celebrarase o venres 8 de novembro a partir das 19:30 horas na propia Biblioteca Antelana, ubicada na Casa da Cultura de Xinzo.