Xosé Manuel Piñeiro faleceu na noite deste martes en Santiago de Compostela aos 68 anos de idade, tras varios anos loitando contra un cancro.
Un dos rostros máis representativos e populares da televisión pública galeganos anos 90, xunto a outros rostros como Xosé Ramón Gayoso, que actualmente segue conducindo o programa "Luar" a noite dos venres.
A noticia da súa morte xerou unha onda de reaccións nas plataformas sociais, onde amigos, seguidores e profesionais dos medios expresaron a súa dor pola perda dun pioneiro da televisión galega. Esta mañá, o programa "Galicia por Diante" de Radio Galega, que comunicou a triste noticia, dedicoulle a Xosé Manuel Piñeiro unhas bonitas palabras. "Marchou un dous grandes e nós quedamos tristes e sós".
As mensaxes de despedida e as homenaxes foron constantes dende a primeira hora do día, as redes sociais asolagáronse de mostras de condolencias cara á súa familia e compañeiros de profesión, destacando o seu legado e a pegada que deixa no mundo da comunicación.
Nado en Allariz en 1957, licenciouse en Filosofía e Ciencias da Educación e foi educador e profesor de filosofía e ética na Universidade Laboral de Ourense, ademais de orientador educativo nos institutos de Finca Sevilla e As Lagoas. Despois marchou a vivir a Vigo, onde era habitual pasear polo centro da cidade e atoparse co emblemático presentador.
Superpiñeiro foi unha das caras máis recoñecidas da Televisión de Galicia, gañándose o agarimo da audiencia polo seu estilo próximo e carismático no seu maior éxito, que foi o programa "Supermartes", que dirixiu durante máis dunha década, entre 1992 e 2005. O impacto que tivo o programa "Supermartes" valeulle o sobrenome de "Superpiñeiro".
Ademais da súa presenza na televisión, a súa voz cativara á audiencia de Radio Galega, converténdose nun referente non só na pequena pantalla, senón tamén nas ondas radiofónicas.
Ao longo de máis de 30 anos, colaborou en diversos programas da TVG e da Radio Galega, ademais de escribir columnas en distintos medios galegos. A súa versatilidade e compromiso coa comunicación consolidárono como un referente no panorama mediático galego.
En 2014, recibiu o Premio Rebulir da Cultura Galega en recoñecemento á súa contribución ao panorama cultural e audiovisual de Galicia.
Tamén estivo á fronte de espazos como Tequelexou, Téquele, téquele ou Acompáñenos. Tamén presentou numerosas galas e especiais na mesma canle autonómico. Desde 2011 presentaba o programa "Bamboleo" e en novembro de 2018 Piñeiro anunciou a súa retirada temporal da televisión xa que estaba a loitar contra un cancro, mieloma múltiple.
Loita contra o cancro
Un tipo de cancro que afecta a medula ósea. Durante a súa intervención no programa 'Luar', explicou que a súa decisión de facer pública a súa enfermidade respondía o desexo de compartir a súa situación co público que o acompañou ao longo dos anos. Destacou a importancia de normalizar este tipo de experiencias, sinalando que moitas persoas enfrontan situacións similares e que compartilas pode ser beneficioso para todos.
Na súa despedida, expresou o desexo de dedicarse plenamente á súa saúde e gozar do tempo cos seus seres queridos. A pesar da súa ausencia nos medios, a súa influencia perdurou grazas ás numerosas repeticións dos seus programas, que continuaron entretendo a xeracións posteriores.
A noticia da súa enfermidade xerou unha onda de apoio e solidariedade por parte de colegas, amigos e seguidores, quen lle enviou mensaxes de ánimo e desexos de pronta recuperación. Este respaldo reflectiu o aprecio e respecto que Piñeiro logrou ao longo da súa traxectoria profesional.
Co seu carisma e o seu inigualable sentido do humor, logrou captar a atención do público galego, destacándose rápidamente como un presentador querido e admirado. Ao longo dos anos, o seu nome converteuse en sinónimo de entretemento en Galicia.
Dez meses máis tarde reapareceu no programa Luar, onde recibiu unha gran ovación, que reflectiu o agarimo e respecto dos galegos cara á súa figura. Finalmente, Superpiñeiro volveu á TVG en 2019 como presentador con Pequenos Fenómenos, a pesar da súa enfermidade. Un programa que capturou novamente o espírito optimista e próximo que o caracterizaba. Tamén retomou a súa faceta radiofónica con Sesión Vermú na Radio Galega.
Desde entón, volveu facer parte en distintas ocasións tanto da programación da Televisión de Galicia como da Radio Galega.
En 2020, a Xunta de Galicia outorgoulle a Medalla Castelao, en recoñecemento á súa destacada contribución á cultura e sociedade galegas. Este galardón entrégase anualmente a persoas e institucións que deixaron unha pegada significativa na identidade galega.
A partida de 'Superpiñeiro' deixa un baleiro na televisión galega e no corazón de quen o admiraba. O seu legado perdurará como símbolo de profesionalismo e dedicación no ámbito da comunicación en Galicia. Superpiñeiro será lembrado non só como un presentador carismático e icónico, senón como un símbolo da identidade audiovisual galega e un exemplo de resiliencia fronte á adversidade.
