O PSdeG pide á Xunta que se faga cargo das "competencias impropias" dos Concellos
No vindeiro pleno da Deputación de Ourense debatirase unha iniciativa do Grupo Provincial Socialista que busca mellorar os mecanismos de financiamento ante o "perigo de viabilidade" de até 36 dos 92 concellos da provincia do que informaba recentemente o Consello de Contas de Galicia.
A institución encargada do control externo da actividade económica e financeira do sector público galego publicaba un informe no que deixaba de manifesto que "a complexidade administrativa e a burocracia supoñen unha carga adicional para entidades que carecen de persoal e recursos para xestionar os proxectos e servizos encomendados". Servizos que, moitas veces, son competencia doutra administración. É o caso, por exemplo, da axuda a domicilio ou da carga económica que supón para un concello rural a atención de instalacións como colexios ou o centros de saúde.
"A moción busca dar resposta aos graves desafíos que enfrontan os nosos municipios, nomeadamente os pequenos, que ademais deben acometer problemas estruturais que, coma o despoboamento e o envellecemento demográfico, acentúan o infrafinanciamento crónico do que adoecen", subliña Aurentino Alonso, deputado socialista pola comarca de Valdeorras.
Adaptar o modelo de financiamento ás necesidades actuais
Insisten os socialistas da "situación crítica" que atravesan os municipios máis cativos do rural por verse na obriga de atender e sufragar cada vez máis amplos e novos servizos. Motivo polo que presentarán a moción na Deputación de Ourense co obxectivo de "revisar o sistema de financiamento para adaptalo ás necesidades actuais". Diste xeito, o Grupo Provincial Socialista fai fincapé no Fondo de Cooperación Local da Xunta de Galicia, de onde proveñen parte importante dos fondos e que leva sen modificarse desde o ano 2009.
O alcalde do Bolo, Alberto Vázquez, aproveitaba para subliñar que "as competencias impropias afogan aos concellos" e comprometen a súa estabilidade. Este pequeno municipio rural é un claro exemplo da situación, tan só recibirá da Xunta 122.000 dos 202.000 euros que precisa para a axuda no fogar; un servizo cada vez máis demandado que é competencia da Xunta. Ante este escenario, os socialistas propoñen medidas específicas dirixidas ao Estado, para que afronte a reforma en profundidade do sistema de financiamento das administracións locais, e á Xunta de Galicia, para que actualice o monto do financiamento dirixido aos concellos.