O PSdeG presenta ao seu novo candidato á alcaldía de Lobios, Iván Rouco
Iván Rouco encabezará a renovada lista do PSdeG-PSOE de Lobios para as eleccións municipais que se celebrarán o vindeiro 28 de maio. Acompañado de xente moza, o obxectivo do candidato é a alcaldía do municipio na súa estrea política apostando por estar a carón da veciñanza no día a día e por políticas enfocadas a mellorar a calidade de vida da xente.
O candidato do PSdeG-PSOE destaca que se presenta a estas eleccións "co propósito de darlle a Lobios o cambio que tanto precisa". Neste senso, subliña que "é necesario deixar a un lado o abandono e o desleixo que vive o noso concello e comezar a traballar por un Lobios con futuro e oportunidades, estando sempre a carón da veciñanza e facendo partícipes os veciños e as veciñas da vida diaria deste concello".
Rouco tamén fai fincapé en que "chegou o momento do cambio e de que Lobios comece unha nova etapa na que se fale de feitos e non de verbas baleiras". O candidato socialista pon de manifesto a necesidade de "remar todos na mesma dirección cun único propósito, Lobios".
Os socialistas da localidade apostan por unha lista electoral na que a mocidade terá "o protagonismo que este concello tanto precisa", xa que tal e como apuntan "estamos a falar dun dos municipios da Baixa Limia con máis persoas mozas, polo que temos que apostar por eles e darlles a oportunidade que nestes momentos non teñen". O obxectivo do PSdeG-PSOE "é que os mozos e mozas de Lobios poidan ter un proxecto de futuro no municipio en lugar de emigrar na procura de oportunidades".
Para o novo candidato, os dous eixes fundamentais polos que traballar e pelexar son a recuperación do dominio das augas termais do complexo termal de río Caldo e "establecer un proxecto de futuro para que convertelo no referente que o municipio precisa". O outro é o remate da autovía AG-31 dende Celanova ata a fronteira portuguesa, xa que tal e como apunta "é imprescindible para mellorar as conexións e para potenciar non só Lobios, senón o resto da comarca".
O socialista tamén salienta que traballará "para asentar poboación e para facilitarlle a vida á veciñanza, estando a carón deles, algo do que hoxe carecen da man do Partido Popular". Tampouco se esquece dos maiores, "referentes do municipio" e aos que segundo afirma "temos que coidar en mellores condicións, apostando por políticas sociais efectivos e por uns servizos dignos e que cubran a demanda da veciñanza".