ENTREVISTA | “Vou facer esta etapa que me gusta e despois xa veremos”

Antonio Míguez Nogueiras (Castealos, Vilar de Santos, 64 anos) será elixido mañá (12:00 horas) alcalde de Vilar de Santos en substitución de Xan Xardón, que presentou a renuncia esta semana por motivos persoais. Míguez Nogueiras está próximo á xubilación no seu traballo de encargado de mantemento da A-52, no que leva 21 anos. É viúvo e ten dous fillos, a filla traballa na hostalaría e o fillo é enfermeiro.

Míguez Nogueiras é un veterano da política local. En 1999 foi elixido por primeira vez concelleiro na lista de Antón Xardón, daquela no BNG. Despois, o mesmo grupo fixo xunto todo un percorrido: do Bloque pasaron a CxG, e máis tarde constituíron unha candidatura independente (Xuntos por Vilar de Santos) hoxe aínda con vínculos coas Mareas, di o próximo alcalde.

“Serei o sexto alcalde de Vilar de Barrio. Sempre estivemos próximos ao Bloque. Todo rexurdiu con Miguel Grande, o cura de Parada de Outeiro, naqueles anos da Transición. Foi cando empezamos a xuntarnos. A xente di que sempre gobernamos os mesmos, pero non é certo. Eu serei o sexto alcalde. Hai renovación. A ver cantos concellos poden dicir iso”, comeza Antonio.

É vostede nacionalista?
Máis galeguista que nacionalista. Non sei se en Vilar de Santos se nos pode considerar nacionalistas. Nacionalistas galeguistas... iso sería o bonito.

Como viviu aquela saída do BNG?
Pois aquilo non foi adiante. Marchou xente en moitos concellos. Nós somos un grupo duns vinte ou trinta veciños e sempre fomos xuntos. Marchamos xuntos do Bloque e marchamos xuntos de Compromiso. Entre nós nunca houbo unha ruptura. Aquí a cabeza visíbel é o alcalde, pero somos moita xente traballando detrás, moita.

Malia os cambios de siglas, seguen encadeando maiorías absolutas...
Traballase duro os catro anos e trabállanse ben as eleccións. A poboación está moi identificada co proxecto. Iso en primeiro lugar. Pero aquí a xente exixe. Vótanche, pero despois exixen. Moito. 

Como tenente de alcalde de Xan Xardón, a que lle dedicou máis tempo nestes anos na xestión?
Pois fixen un pouco de todo. Estamos moi compenetrados. O alcalde é o que fai, pero eu sempre estiven moi próximo ás veciñas e aos veciños. 

A xente quere ver ao alcalde. Nun principio, esa é a miña intención, estar máis na rúa, nas aldeas

Di que o alcalde é o que fai, agora tócalle a vostede...
Eu son máis partidario do grupo. 

Vai cambiar cousas?
Un pouco. Creo que debería estar máis nas aldeas... mesmo estou pensando en recuperar pedáneos. Hai que estar próximos á xente. E a xente quere ver ao alcalde. Nun principio, esa é a miña intención, estar máis na rúa, nas aldeas.

Por que foi elixido vostede para suplir a Xan Xardón?
Foi un acordo unánime. Nós nunca usamos o voto en papeleta, sempre é a man alzada. Somos todos compañeiros, non hai ese interese en ser o alcalde. Que eu sexa o relevo obedece tamén a certa coincidencia. Estou próximo ao retiro. Vou ter tempo. E voulle dedicar un tempo.

Como valora a figura de Xan Xardón?
É un home moi preparado. E non se lle pode pedir máis do que fixo. Penso que a pandemia cambiou todo. Nunha época tivo dedicación exclusiva e agora xa non a ten. Pero a xente segue querendo ver ao alcalde.

Que eu sexa o relevo obedece tamén a certa coincidencia. Estou próximo ao retiro. Vou ter tempo

Terá vostede dedicación exclusiva?
Non. Vou facer esta etapa que me gusta e despois xa veremos.  

Xardón deixa o cargo por circunstancias familiares. Volverá se esas circunstancias llo permiten?
Penso que non. Son dos que penso que temos que lle ir dando paso a outra xente.

Temos que facer as cousas para lle dar paso á xente nova. Esa é a miña idea. O único seguro é que estarei un ano e dous meses

Vostede tamén se descarta como candidato o próximo ano?
Agora non toca. Mais de verdade que penso que temos que facer as cousas para lle dar paso á xente nova. Esa é a miña idea. O único seguro é que estarei un ano e dous meses. 

Chégalle tarde esta ocasión de ser alcalde?
Xa puiden ser alcalde cando o deixou Antón Xardón no 2005. Pero aquí, insisto, non hai ese interese en ser isto ou aquilo. Eu tiña o meu traballo. Antes estiveron outros, Enrique, Manolo, Arturo... Veu o Xan, e moi ben. Dezaseis anos, e moi ben.

Manterán as siglas para as próximas municipais?
Xa veremos... [sorrí]. En serio, o alcalde é a cabeza visíbel, pero detrás hai un grupo grande e sempre temos moito apoio. Nas municipais vótanos tamén xente do PP, se non as cifras non darían.