NOTICIAS A LIMIA | Un pleno que dura un bocexo

O primeiro pleno do 2022 foi unha sesión curta, como un bocexo. A corporación despachou os asuntos do día nunha sesión rápida, 20 minutos. Unanimidade en todos os puntos. Con Montse Lama, ex PP, ex C’s, participando a través dunha pantalla, cada vez máis lonxe da política (local).  

Foi un pleno rutinario, calmado e con boas maneiras a 14 meses das municipais. Os tambores electorais empezarán a soar pronto. Con moitas incógnitas aínda por despexar. Unha, pode que a menos importante, o futuro de Montse Lama. 

En menos de cinco minutos quedaron aprobadas a prórroga do contrato coa central de contratacións da Fegamp (Federación Galega de Municipios e Provincias) para o subministro eléctrico, o convenio co Concello de Sandiás para pavimentar o Camiño das Aforadas, e a adaptación da ordenanza municipal á suba da taxa sobre as plusvalías dos predios urbanos.

Despois foron aprobadas as declaracións institucionais sobre igualdade, con motivo do 8M, e outra de apoio ao pobo ucraíno e condena da “agresión rusa”. Era o trámite que faltaba por completar con estes dous documentos que foron lidos nos días anteriores pola alcaldesa: o martes na praza Maior, e onte diante da Casa do Concello.

A respecto do conflito bélico en Europa, nunha intervención breve, Montse Lama dixo que lle parece “marabilloso ver esa humanidade que realmente nos ten que mover a todas as persoas que conformamos este mundo”, en referencia as mostras de solidariedade destes últimos días.

Non houbo debate porque catro mocións que presentaba o PP non pasaron o filtro da última comisión. De tal xeito que ficaron fóra do pleno cuestións que, en teoría, lle preocupan a unha parte ampla da poboación de Xinzo, á que representa o PP. 

No punto de rogos e preguntas, a alcaldesa respondeu ás interpelacións do PP na sesión anterior. Dixo que a comisión de seguimento da RPT (Relación de Postos de Traballo) se constituirá “no seu día”; que a limpeza de rúas e parcelas no Barrio de Abaixo xa se fixo; e que a reparación das fochancas no aparcadoiro de terra na rúa Curros Enríquez tamén se acometeu.

Finalmente, a alcaldesa contestou tamén a algunha das preguntas que os populares levaron á sesión de hoxe. Tomou nota da petición do PP para que se estableza algún mecanismo de aviso a todos os membros da corporación no caso de falecemento dalgún familiar de calquera traballador municipal e concelleiras ou concelleiros. Desculpouse polo erro de que os populares non recibiran toda a documentación que solicitaron sobre a débeda do Concello. Explicou que o cambio das luminarias esta en fase de presentación de ofertas, e que o reloxo do Entroido estaba avariado e que por iso non se puido utilizar. E quedou que no próximo pleno daría conta do custe da pantalla que substituíu ao reloxo.

Tamén quedaron pendentes de resposta para o próximo pleno as cuestións relativas ás razóns de por que a alcaldesa non participou na sinatura en Compostela do futuro Plan de Saúde, e ao mal estado dos pasos de peóns e da rotonda no cruzamento da avenida de Ourense coa de Celanova.

Antes das dez, o trámite plenario quedou listo. O Salón de Plenos espera sesións máis animadas.