NOTICIAS A LIMIA | Xinzo non se quita a máscara

Xente con máscara pola rúa, xente con máscara no supermercado, no banco, na panadería, na praza de abastos, nos xulgados, nos bares, nas tendas, na biblioteca... A veciñanza de Xinzo segue usando a máscara contra a covid, malia a eliminación da obrigatoriedade hai uns días. A xente non se fía, e cada quen ten a súa opinión sobre levala ou non levala.

“Traela hai que traela, polo menos no peto, porque se vas á farmacia ou ao centro de saúde, pois tes que poñela”, comenta un veciño, un dos poucos sen máscara este xoves, nunha conversa que interrompe o Diario do Limia na rúa Ladeira, preto do centro de saúde. Enfronte, nun café moi frecuentado polo persoal sanitario, as sanitarias están todas con máscara á hora do café.

Na praza de abastos, unha das carniceiras, con máscara, confirma que a clientela entra xa coa máscara posta e non a quita durante as compras. “Sabemos que aquí non é preciso usala, temos ademais un espazo moi ventilado. Pero xa nos acostumamos, e penso que durante unha tempada isto vai seguir igual”. Ela di que pola rúa non a pon, mais si cando entra ao cole para recoller o fillo. “Un pouco por respecto, porque a profesora que sae tamén trae máscara, case todas as nais e país imos con máscara”.

Na biblioteca pública da Casa da Cultura, a esta hora da mañá, a cousa cambia. Gañan as caras descubertas. Xa se pode. Hai cinco usuarias, só unha con máscara. “Eu penso que me acostumei e sigo con ela. Non é por medo, non... Estamos case sempre as mesmas. Creo que irei sacándoa pouco a pouco”, di.

A muller que despacha nunha das panaderías do centro leva máscara, “toda a xornada”. Explica que a clientela segue entrando con máscara. Na rúa, dúas mulleres volven do mercado charlando animadamente detrás de máscaras de cores. “Si que coñecemos as normas, pero aínda non estamos moi seguras de todo”, comenta Maribel. A súa acompañante confesa que ela segue usando a máscara pola rúa “sempre que hai moita xente”. 

“O curioso é que a moita xente, cando había que poñela, custoulle moito, e agora que se pode ir sen ela, cústalles quitala”, di unha moza á saída do supermercado.

Nos bancos e nos supermercados o persoal leva máscara. Nas caixas de cobro á saída permanecen as pantallas protectoras. A venda de máscaras empezou a descender hai un par de semanas. E non se recupera. Os prezos continúan máis ou menos igual. “Aquí case toda a xente que entra, por agora, vén con máscara. Mais é curioso, algunhas clientas pregúntannos a nós como é que imos coa máscara”, comenta unha empregada. 

Na rúa, Jesi, unha moza que vén coa compra na man e sen máscara, di que ela pensa que “hai que ir normalizando a cousa de ir sen máscara”, mais entende que as persoas maiores aínda se sentan máis seguras se a levan. “O curioso é que a moita xente, cando había que poñela, custoulle moito, e agora que se pode ir sen ela, cústalles quitala”.

Na conversa xunto ao centro de saúde, hai dúas persoas con máscara e unha sen ela. O máis prudente é un home que leva posta unha do modelo FFP2. “Hai que esperar”, di, “vimos da Semana Santa e houbo moitos encontros, veremos se os casos soben ou non”. Confesa que leva a máscara todo o tempo. Ao seu lado, unha muller, tamén con máscara, di que a coloca cando se topa con xente na rúa, e nos bares non a quita. “Eu penso que en dúas semanas poderemos valorar, polo momento, eu sigo con ela”, informa o home da FFP2.

“Imos estar con ela polo menos até o verán, xa lle digo”, aventura Maribel, coa súa amiga de volta das compras da mañá. Nas farmacias hai colas fóra. Toda a clientela con máscara, como é preceptivo. As colas desapareceron das oficinas bancarias e dos centros da administración, mais no interior o persoal segue coa máscara, e a xente, moita por respecto, como esas nais que van ao cole recoller ás fillas, tamén a levan. O persoal da Policía Local e da Garda Civil tamén mantén o uso da máscara.

A máscara segue pegada a nós, polo menos en Xinzo.