NOTICIAS XINZO | A beirarrúa dos horrores esquecida pola alcaldesa Elvira Lama

Os veciños dos números 131 e 133 da avenida de Madrid, en Xinzo, están fartos. O mal estado no que se atopa a beirarrúa é un perigo para os viandantes e tamén para os vehículos que teñen que saír dos garaxes dos dous edificios. "Empezouse a fundir e, ao principio fun arranxándoo eu, pero canseime porque non era a miña obrigación", sinala José Luis Casado, un dos afectados.

O problema xa non é novo. Ao redor de hai case un ano empezou diante dun dos edificios, mentres que no outro "uns dous ou tres meses". O Concello puxo solucións que non foron as máis axeitadas, como colocar unha chapa de plástico que se retirou. "A min deume moitos problemas para entrar ao garaxe coa miña furgoneta cargada", lamenta Casado. Nos edificios, ademais, viven polo menos dúas mulleres de avanzada idade e con problemas de mobilidade para as que saír da casa é un perigo.

Nestes dous números, os baixos contan con vados autorizados para reservar o espazo para a entrada e saída dos vehículos. "Temos dous vados e pagamos polo seu servizo, pero o Concello non cumpre", sinala Casado. A Policía Local xa acudiu ao lugar e os veciños presentaron escritos oficiais para esixir a reparación da beirarrúa. "Incluso lle mandei fotos á alcaldesa -Elvira Lama- polas súas redes sociais e por privado, para non armar moito escándalo, e nin me contestou", engade Casado. 

A pasada fin de semana, este veciño da avenida de Madrid non pudo sacar o seu vehículo pola situación da beirarrúa e tivo que buscar alternativas con taxis e coñecidos. "Necesitamos que o arranxen xa", destaca. A última actuación que levaron a cabo dende o Concello, despois deste novo incidente, foi botar grava nunha das zonas afectadas, o que Casado cree que "se volverá fundir".