NOTICIAS A LIMIA | Porqueira remata camiños mentres segue coas obras para garantir a auga
A alcaldesa Susana Vázquez (PP) está este xoves a pé de obra no Toxal, unha das aldeas do concello que primeiro sufriu as restricións de auga pola seca e unha das primeiras en recuperar o servizo grazas á perforación dun pozo en Sabucedo. En xullo Vázquez recorreu á Deputación Provincial para completar o financiamento do novo pozo co que abastecer núcleos da chaira como Filgueira e Toxal. Mais este último xoves de agosto as obras consisten na reparación de camiños e do asfaltado nas propias aldeas.
“Estamos aproveitando o bo tempo para o mantemento grazas á brigada de obras da Deputación de Ourense. Este é un ano complicado pola cuestión da seca, mais non podemos atrasar estas obras até o inverno. Hanse arranxar camiños en varios núcleos, calculo que no 40% do total de núcleos do concello. Hoxe [por onte] toca traballos aquí, en Penín e no Toxal, non se se dará tempo a ir a Sabucedo”, explica Susana Vázquez a media mañá mentres varias máquinas e operarios reparan o firme no cruce á entrada do Toxal, onde a capela.
“Estamos aproveitando o bo tempo para o mantemento grazas á brigada de obras da Deputación de Ourense. Este é un ano complicado pola cuestión da seca, mais non podemos atrasar estas obras até o inverno”, explica Susana Vázquez, a alcaldesa.
Vázquez reuniuse esta semana co presidente da Deputación, Xosé Manuel Baltar, quen a finais de maio visitou Porqueira. “Baltar veu a San Lourenzo comprobar o resultado da primeira fase do Plan HURBE, e agora estamos coa segunda fase e fun tratar coa Deputación novas achegas. A Xunta financia o 70% do plan, pero os concellos teñen que poñer o resto, e ese 30% son demasiados cartos para un concello como o noso, así que a Deputación botará unha man”.
Na reunión en Ourense tamén se tratou a cuestión da auga. A Deputación xa financiou a perforación de dous pozos (o de Sabucedo e o de San Mamede, ambos en xullo). Agora o Concello de Porqueira está acometendo unha obra no depósito de Fontemoura para garantir o servizo a esa poboación. Tamén está instalando tubaxes entre captacións para repartir a auga, e seguen chegando as cisternas. Onte mesmo, outra. “Pedín a Baltar axuda para estas pequenas obras que son imprescindíbeis nestes momentos”, di a alcaldesa. “A disposición é boa”. A actuación en Fontemoura custará por riba dos 40.000 euros, pon como exemplo Vázquez.
Mais o impacto das novas esixencias na xestión da auga, Susana Vázquez mantén outros plans de intervención. E este mes estase acondicionando a Ruta das Fervenzas do Río Fírbeda. “Levará uns 20.000 euros, hanse facer camiños alternativos, xa empezaron a reparar as cordas e outras actuacións de mantemento que poidan precisar os muíños”.