A Asociación Cultural Civitas Limicorum ten o pracer de anunciar unha nova e ilusionante proposta dentro do seu Annus Argenteus, o ano do seu 25 aniversario. O Forum Limicorum Musical celebrarase o sábado 21 de xuño en Xinzo de Limia, froito da colaboración directa entre a Asociación e o Conservatorio Profesional de Música da vila.
Este evento supón un paso máis na aposta da Asociación por involucrar nas súas programacións os diferentes colectivos e agrupacións locais, aportando valor á cultura e á identidade de Xinzo. Nesta ocasión, xunto co Conservatorio, ofrecerase un espectáculo musical e visual sen precedentes, cun formato completamente aberto e gratuíto para toda a cidadanía.
A data do evento quedou oficialmente fixada tras a reunión celebrada hoxe entre a Civitas, co seu presidente Marcos Argibay e a tesoureira Ana Lozano, e o Conservatorio Profesional de Música de Xinzo, representado pola súa directora, Esmeralda Marra.
O Forum Limicorum Musical será unha das moitas actividades especiais que Civitas Limicorum presentará ao longo deste 2025 para conmemorar os seus 25 anos de historia, consolidándose como un referente cultural e social en Xinzo.
Animamos a toda a veciñanza a marcar o 21 de xuño no seu calendario! En breve desvelaremos máis detalles sobre o que acontecerá esa xornada, pero podemos garantir que será unha experiencia única para os sentidos.
