A xornada informativa sobre economía circular celebrada onte no Centro de Desenvolvemento Agrogandeiro de Xinzo de Limia e organizada polo Inorde, coa presencia da súa xerente, Emma González, e na que se trataron posibles alternativas eficientes na xestión de xurros e estercos contou coa presencia de agricultores, comunidades de regantes, técnicos da IXP Pataca de Galicia e mesmo algún responsábel político como o alcalde de Trasmiras, Emilio Pazos. Porén, desde a organización botaron en falta unha maior representación de gandeiros. “O 90% dos asistentes pertencen ao sector agrícola. Só vimos dous gandeiros. Adegal [a Asociación de Empresarios, Gandeiros e Agricultores da Limia] non participou”, lamentaron os organizadores.
A sesión de onte serviu para que a xefa de Servizo de Explotacións Agrarias en Ourense, Encarna Rodríguez Soto, anunciase publicamente en Xinzo que a Xunta de Galicia está visitando explotacións de porcino para analizar a produción de residuos de cada granxa, a súa capacidade de almacenamento e o destino que lle dan.
🐘🌱🐽🐔 𝗢 𝗘𝗟𝗘𝗙𝗔𝗡𝗧𝗘 𝗗𝗔 𝗖𝗢𝗡𝗧𝗔𝗠𝗜𝗡𝗔𝗖𝗜𝗢́𝗡 | MEDIO RURAL RECOÑECE QUE 𝘅𝗮 𝗮𝗻𝗮𝗹𝗶𝘇𝗮𝗻 𝗴𝗿𝗮𝗻𝘅𝗮𝘀 𝗱𝗲 𝗽𝗼𝗿𝗰𝗼𝘀 𝗽𝗮𝗿𝗮 𝘀𝗮𝗯𝗲𝗿 𝗰𝗮𝗻𝘁𝗼𝘀 𝘅𝘂𝗿𝗿𝗼𝘀 𝘀𝗲 𝗽𝗿𝗼𝗱𝘂𝗰𝗲𝗻 𝗲 𝗾𝘂𝗲 𝘀𝗲 𝗳𝗮𝗶 𝗰𝗼𝗻 𝗲𝗹𝗲𝘀.https://t.co/i0UN6Glfy5
— Diario do Limia (@diariodolimia) June 22, 2022![Publicidad 7065]()
Ademais, Alfredo Rúa, xefe da Área de Seguridade Alimentaria do Servizo de Gandaría de Medio Rural, tivo unha breve intervención para poñer en contexto a problemática dos xurros na Limia e avanzar algunhas vías para minimizar o impacto sobre as augas e os solos.
“No caso dos residuos de cebo de vacún e de cebo de polos os residuos teñen o seu valor, teñen un mercado e teñen incluso os seus operadores, e nesta comarca é habitual que algún deses subprodutos se empreguen no cultivo da pataca”, comezou Rúa. E a continuación puxo como exemplo comarcas como Lalín e Silleda, cunha cabana gandeira de porcino “tan grande ou máis que a da Limia e que non xera os problemas que está xerando aquí”.
CULTIVOS PARA AS VACAS
“A diferencia é que nesas comarcas”, engadiu o xefe da Área de Seguridade Alimentaria, “existen cultivos de pasto que si valorizan estes residuos e os transforman en forraxe para o gando vacún”. Explicou o responsábel de Medio Rural que na Limia “non existe esa cabana de vacún tan abundante” e sinalou que unha das vías é “acoller modelos silvipastorís que asuman os xurros e que os transformen para sacar ese nitróxeno e o fósforo fóra”.
Mais esa non é unha solución a curto prazo, recoñeceu Rúa. Ademais, o prazo para a declaración da comarca como zona vulnerábel á contaminación comezou a correr xa. “Mentres, non queda outra que empezar a extraer o nitróxeno e o fósforo que se produce na Limia e tratar de sacalos para outras comarcas”.
A COMPOSTAXE
Neste punto, Rúa sinalou medidas como separar o xurro de porcino “nunha fase líquida e noutra sólida, na que a parte sólida leva o 30 ou 40% do nitróxeno e o 60 ou 70% do fósforo e pode ser compostada xunto con outros materiais”. Esa é a iniciativa que “hoxe se están poñendo en marcha”, dixo Rúa. Pero aínda non hai esa planta de compostaxe para “sacar da Limia ese estrato seco”, recoñeceu.
O xefe da Área de Seguridade Alimentaria do Servizo de Gandaría de Medio Rural concluíu a súa intervención apuntando que esas dúas vías, o sistema silvipastoril e a compostaxe, “nun marco de economía circular que dea lugar aos cambios que necesitamos na xestión do xurro”.
ESPECIFICIDADE DA LIMIA
No debate posterior ás conferencias, e segundo informa o Inorde, os produtores demandaron para A Limia unha planta de tratamento dos subprodutos que xera a gandaría intensiva na comarca, poñer en valor estes subprodutos e empezar a velos como unha oportunidade. Tamén insistiron en que A Limia precisa solucións propias pola súa especificidade e mostráronse abertos a participar en redes colaborativas (un dos obxectivos da xornada era presentar algunhas destas redes), en especial nas que faciliten o acceso á maquinaria.
