O Antela pon a disposición de socios e simpatizantes 30 prazas no bus do equipo que viaxará mañá a O Carballiño para disputar o partido correspondente á cuarta xornada da fase de ascenso a Preferente. A saída da expedición limiá está prevista para as 14:45 horas desde a estación de autobuses.
No Carballiño, o partido diante do Sporting Carballiño comezará ás 17:00 horas na Uceira (herba artificial), coa arbitraxe de Yago Casas. Óscar Sabucedo recupera a Breixo, Pedro e Borja. Mais non poderá contar con Quintairos, lesionado, nin con Pancho, por motivos laborais. Tamén son baixa Pisto e Belucho. Repite convocatoria o xuvenil Borja Carballo.
O encontro é clave para as aspiracións dos limiaos. Necesitan gañar fóra, descartar definitivamente un rival co que volverán a cruzarse na segunda volta de competición e recortar puntos coa cabeza (A Peroxa e Celanova enfróntanse esta xornada).
Sabucedo poderá recompoñer a columna vertebral do equipo. E Pablo e Juan Forri apuntan de novo á titularidade polas baixas de Quintairos e Pancho.
O regreso de Breixo, Pedro e Borja permitirá a Sabucedo recompoñer a columna vertebral do equipo. Pablo Forri e Juan Forri apuntan de novo á titularidade polas baixas de Quintairos e Pancho. Carrasco, Samuel e o xuvenil Carballo garanten o relevo desde o banco.
Despois dun partido durísimo na Uceira contra o Celanova (4-4), o Sporting Carballiño baixou os brazos en Barbadás e saíu derrotado (3-0) e como colista do grupo. O equipo que adestra Manuel Rodríguez, que verá o partido desde a grada por suspensión, suma 3 puntos despois de dúas derrotas e un empate nesta fase, na que recibiu 9 goles.
A derrota en Allariz (2-1) no inicio da fase de ascenso foi a primeira este ano do Sporting Carballiño, que desde xaneiro encadeou seis vitorias e dous empates (diante do Vilariño e do A Peroxa) para amarrar unha praza na promoción. Os carballiñeses remataron o 2021 na quinta posición despois dunha derrota en Cortegada. A partir daquel momento, até o choque diante do Celanova, eran un equipo en progresión. Manu Otero, con seis goles na fase anterior, segue a ser o seu máximo anotador, mais empezou esta fase como suplente e recuperou a titularidade o domingo pasado.
No resto da xornada, o Atlético Vilariño recibe ao Barbadás B; o A Peroxa, ao Celanova; e o Maside, ao Allariz. En cada un deles, hai moito en xogo. No Marco, A Peroxa e Celanova disputarán o liderado antes do descanso da semana que vén, co Allariz pendente de dar caza aos de cabeza. O Vilariño segue con opcións. No caso do Barbadás e do Maside, para manter as súas precisan gañar.
