A Escola de Música da Limia (ESMULI) ofrece mañá un concerto de Nadal para a veciñanza, no que se reunirá a un cento de músicos das diferentes formacións colectivas. A cita comezará ás 20:00 horas na Casa da Cultura de Xinzo e durará pouco máis dunha hora. Polo escenario pasarán a Agrupación Musical da Limia, a Coral Santa Mariña, a Chikiband e os alumnos de Música e Movemento. "Xuntaremos a unhas 130 persoas para actuar neste concerto", destaca José Luis Tielas, coordinador da ESMULI e director da Agrupación Musical da Limia.
Os primeiros en actuar serán os 37 cativos, de entre tres e cinco anos, alumnos de Música e Movemento, que porán o toque festivo do evento cantando algunhas panxoliñas, entre outras cousas. "É unha pasada a cantidade de nenos que temos este ano", apunta Tielas.
Os máis pequenos darán paso á Chikiband, que vén de ser a gañadora na Sección Infantil do Certame Galego de Bandas de Música a principios deste mes. "Os rapaces interpretarán o programa co que gañaron e esta actuación servirá como unha homenaxe para eles", asegura Tielas, sobre esta formación con integrantes que van dos sete aos 15 anos. Interpretarán, ao igual que o fixeron en Celanova, "A lenda de Breogán" e "A pastoriza".
A Agrupación Musical da Limia será a seguinte en actuar e interpretará unha única peza de 15 minutos chamada "Sajelbon". Nela mestúranse música electrónica e de banda e, pese a que os membros da agrupación só tiveron un mes para preparala, seguro que sorprenden ao público. Por último, a Coral Santa Mariña subirá ao escenario para cantar máis pezas musicais. Esta festa do Nadal rematará cun repertorio popular galego para poñerlle fin ao cocerto.
Inmersos no presente curso, a ESMULI contará nesta actividade de Nadal cun gran número de persoas que reflexan o seu éxito. "Este ano batimos outra vez o récord de matriculacións e vamos bastante ben", afirma Tielas. O que lamenta é que Xinzo non conte cun espazo acorde para o tipo de actividades que se poden chegar a organizar na ESMULI. "Estamos moi limitados porque só dispoñemos do salón de actos da Casa da Cultura, no que moitas veces non colle a xente que temos, ou da igrexa de Santa Mariña, que non sempre é o sitio máis axeitado para as pezas que queremos interpretar", explica Tielas.
