O Concello de Xinzo de Limia presentou os Premios de Xornalismo Literario Carlos Casares 2024, consolidándose como unha iniciativa cultural de continuidade. Este ano, o certame rende homenaxe a Pilar García-Cernuda Lago, recoñecida xornalista e escritora nada en Santiago de Compostela, pola súa destacada traxectoria profesional e o seu compromiso coa divulgación a través do xornalismo.
A presentación do evento contou coa participación de Amador Díaz, alcalde de Xinzo; Carlos Gómez, concelleiro de Cultura; e Xabier Casares, presidente da Fundación Carlos Casares. Durante o acto, destacouse o valor destes premios para poñer en relevo a figura de Carlos Casares e o vínculo de Xinzo coa literatura e o xornalismo. "Estes premios son un exemplo más do noso compromiso coa cultura, recoñecendo talentos que unen literatura e xornalismo" comentou Amador Díaz.
Nas súas edicións anteriores, os premios foron outorgados a figuras de gran relevancia, como Alfonso Vázquez-Monxardín na primeira edición, e ao xornalista Antonio Piñeiro na segunda, reafirmando o nivel e o prestixio deste certame. Este ano, o galardón a Pilar Cernuda representa unha homenaxe á súa longa e prolífica carreira, que inclúe a cobertura de feitos históricos e a publicación de novelas e ensaios de gran impacto.
O xurado, composto por 14 mulleres e homes relacionados co eido literario e cultural galego, destaca pola súa diversidade e compromiso coa excelencia literaria. "O traballo deste xurado garante a calidade e o prestixio dos Premios Carlos Casares, converténdoos nun referente no panorama galego" subliñou Carlos Gómez.
Os Premios Carlos Casares son unha mostra do traballo conxunto do Concello de Xinzo e as entidades culturais da zona, fortalecendo a súa posición como núcleo dinamizador da cultura na Limia. "Para nós, manter vivo o legado de Carlos Casares e apoiar iniciativas coma esta é fundamental para o compromiso da Fundación" afirmou Xabier Casares.
A gala de entrega do premio terá lugar o próximo 20 de decembro ás 20:00 horas no Casino Antelano de Xinzo, con entrada libre, e contará con intervencións artísticas e culturais que renderán homenaxe á galardoada Pilar Cernuda e á figura de Carlos Casares.
