O luns 23 de decembro, terá lugar a Gala do Deporte Xinzo de Limia 2024, un evento organizado polo Concello de Xinzo de Limia co obxectivo de recoñecer publicamente o esforzo, a dedicación e os valores vinculados á práctica deportiva. Esta gala busca premiar a deportistas, equipos e entidades do concello que destacaron ao longo da tempada 2023/2024.
Entre as categorías a premiar inclúense:
• Mellor Deportista absoluto (masculino e feminino).
• Mellor Deportista promesa (masculino e feminino).
• Mellor equipo (absoluto e de base).
• Mención especial do xurado.
As candidaturas poden ser presentadas por calquera persoa física ou xurídica do concello, directamente ou a través de propostas de entidades. O prazo de presentación estará aberto ata as 14:00 horas do 9 de decembro de 2024. Os interesados deberán entregar a documentación no Rexistro do Concello, na súa Sede Electrónica ou na oficina do Pavillón de Deportes.
O evento pretende recoñecer non só os logros deportivos, senón tamén o labor de colaboración desinteresada a favor do deporte local. Un xurado será o encargado de valorar os méritos presentados e de escoller aos galardoados.
Desde o Concello de Xinzo de Limia convidamos á veciñanza a participar activamente nesta iniciativa e a acompañarnos na gala para celebrar o talento e o compromiso deportivo da nosa comunidade.
